📰 પવન એક્સપ્રેસ

બનાસકાંઠા જિલ્લામાં નશીલા પદાર્થો સામે પોલીસની સઘન કાર્યવાહી

SOG અને સ્થાનિક પોલીસની સંયુક્ત મેગા ડ્રાઇવમાં MD ડ્રગ્સ, ચરસ, અફીણ સહિત રૂ. ૧.૯૯ કરોડનો મુદ્દામાલ જપ્ત.

બનાસકાંઠા: બનાસકાંઠા જિલ્લામાં નશીલા પદાર્થોના ગેરકાયદેસર વેપાર, હેરાફેરી અને સેવન સામે જિલ્લા પોલીસ અધિક્ષક શ્રી પ્રશાંત સુંબેના નેતૃત્વ અને માર્ગદર્શન હેઠળ બનાસકાંઠા પોલીસ દ્વારા સતત સઘન કાર્યવાહી હાથ ધરવામાં આવી રહી છે.

તા. ૦૧/૦૧/૨૦૨૬થી આજદિન સુધી SOG તથા વિવિધ સ્થાનિક પોલીસ સ્ટેશનો દ્વારા મળેલી બાતમીઓના આધારે જિલ્લામાં અલગ-અલગ સ્થળોએ તપાસ અને કાર્યવાહી કરવામાં આવી હતી. આ દરમિયાન પોલીસે વિવિધ પ્રકારના કુલ ૫૨૪ કિલો ૧૫૨ ગ્રામ ૭૧૩ મિલીગ્રામ જેટલા માદક પદાર્થો જપ્ત કર્યા છે, જેની કુલ અંદાજિત કિંમત રૂ. ૧,૯૯,૨૭,૬૭૮.૩૭ હોવાનું પોલીસ દ્વારા જણાવાયું છે.

🚨 કયા-કયા નશીલા પદાર્થો ઝડપાયા?

પોલીસ કાર્યવાહી દરમિયાન—

• મેથાએમ્ફેટામાઇન: ૩૪ ગ્રામ — કિંમત રૂ. ૩,૪૦,૦૦૦
• સુકો ગાંજો: ૬૬.૧૦ કિલોગ્રામ — કિંમત રૂ. ૩૨,૮૬,૭૨૨.૫૦
• ગાંજાના છોડ: ૪૨.૮૯૪ કિલોગ્રામ — કિંમત રૂ. ૨૧,૪૪,૭૦૦
• મોર્ફીન તથા હેરોઇન: ૨૧૬.૧૨૫ ગ્રામ — કિંમત રૂ. ૨૩,૪૭,૦૦૦
• ચરસ: ૧૩.૮૭૯ કિલોગ્રામ — કિંમત રૂ. ૩૬,૪૭,૨૫૦
• MD (મેફેડ્રોન): ૩૭૩.૬૭૯ ગ્રામ — કિંમત રૂ. ૧૧,૫૪,૦૮૦
• અફીણ: ૨.૦૪૬ કિલોગ્રામ — કિંમત રૂ. ૧૦,૨૩,૦૫૦
• પોષડોડા: ૩૯૮.૭૦૦ કિલોગ્રામ — કિંમત રૂ. ૫૯,૮૦,૫૦૦
• નશીલી ટેબ્લેટ્સ: ૬૫૫

આમ, બનાસકાંઠા પોલીસની સંયુક્ત કામગીરીમાં મોટી માત્રામાં વિવિધ પ્રકારના નશીલા પદાર્થો જપ્ત કરવામાં આવ્યા છે.

⚖️ ૩૦ ગુના નોંધાયા, ૫૧ આરોપીઓ સામે કાર્યવાહી

સમગ્ર કામગીરી દરમિયાન બનાસકાંઠા જિલ્લાના અલગ-અલગ પોલીસ સ્ટેશનો ખાતે NDPS એક્ટ હેઠળ કુલ ૩૦ ગુનાઓ નોંધવામાં આવ્યા છે અને કુલ ૫૧ આરોપીઓને ઝડપી પાડવામાં આવ્યા છે. ઝડપાયેલા આરોપીઓ વિરુદ્ધ નાર્કોટિક ડ્રગ્સ એન્ડ સાયકોટ્રોપિક સબસ્ટન્સિસ (NDPS) એક્ટની જોગવાઈઓ હેઠળ કાયદેસરની કાર્યવાહી હાથ ધરવામાં આવી છે.

🔒 બે આરોપીઓ સામે PIT-NDPS હેઠળ કાર્યવાહી

બનાસકાંઠા જિલ્લામાં NDPS સંબંધિત ગેરકાયદેસર પ્રવૃત્તિમાં સંડોવણી ધરાવતા ઇશ્વરભાઇ ઉર્ફે હેન્ડલ કેશાભાઇ સલાટ તથા સંજયભાઇ ભેમાજી ઠાકોર જામીન પર મુક્ત થયા બાદ પણ નશીલા પદાર્થોની પ્રવૃત્તિમાં સંડોવાયેલા હોવાની શંકાસ્પદ હિલચાલ જણાતા તેમની જરૂરી વિગતો મેળવી The Prevention of Illicit Traffic in Narcotic Drugs and Psychotropic Substances Act, 1988ની કલમ ૩(૧) હેઠળ કાયદેસરની કાર્યવાહી કરવામાં આવી હતી.

બંને આરોપીઓને અટકાયત બાદ મધ્યસ્થ જેલ, વડોદરા તથા સુરત ખાતે સોંપવામાં આવ્યા હોવાનું પોલીસ દ્વારા જણાવાયું છે.

👮‍♂️ બાતમીદારોનું નેટવર્ક સક્રિય

નશીલા પદાર્થોની હેરાફેરી અને ગેરકાયદેસર પ્રવૃત્તિઓને અટકાવવા માટે બનાસકાંઠા પોલીસ દ્વારા બાતમીદારોનું નેટવર્ક સક્રિય કરવામાં આવ્યું છે. શંકાસ્પદ હિલચાલ પર સતત નજર રાખી SOG તથા સ્થાનિક પોલીસ દ્વારા સંકલિત રીતે કાર્યવાહી કરવામાં આવી રહી છે.

પોલીસની આ કામગીરીથી નશીલા પદાર્થોના ગેરકાયદેસર નેટવર્ક સામે મોટો પ્રહાર થયો હોવાનું સામે આવ્યું છે.

🚔 નશામુક્ત સમાજ માટે પોલીસની ઝુંબેશ યથાવત્

બનાસકાંઠા પોલીસ દ્વારા યુવાનો અને સમાજને નશામુક્ત રાખવા માટે નશીલા પદાર્થો સામેની કાર્યવાહી આગામી દિવસોમાં પણ વધુ કડક અને સતત ચાલુ રાખવામાં આવશે.

પોલીસ દ્વારા નાગરિકોને અપીલ કરવામાં આવી છે કે નશીલા પદાર્થોની ગેરકાયદેસર હેરાફેરી, વેચાણ કે સંગ્રહ અંગે કોઈપણ માહિતી મળે તો તાત્કાલિક પોલીસ સુધી પહોંચાડવી, જેથી સમાજને નશાના દૂષણથી બચાવવામાં સહયોગ મળી શકે.

— પવન એક્સપ્રેસ | બનાસકાંઠા