અમદાવાદ અને સુરતમાં 1000થી વધુ બાંગ્લાદેશીઓ પકડાયા

ગુજરાત પોલીસે અમદાવાદ અને સુરતમાં ગેરકાયદેસર રહેતા 890 અને 134 બાંગ્લાદેશીઓની અટકાયત કરી. બોગસ ડોક્યુમેન્ટ સાથે રહેતા આ લોકો સામે દેશનિકાલની કાર્યવાહી શરૂ. ગૃહ મંત્રીએ ચેતવણી આપી.

ગુજરાત પોલીસે શુક્રવારે મોડી રાત્રે અમદાવાદ અને સુરતમાં અત્યાર સુધીનું સૌથી મોટું ઓપરેશન હાથ ધરી, ગેરકાયદેસર રીતે રહેતા 1000થી વધુ બાંગ્લાદેશી નાગરિકોની અટકાયત કરી. અમદાવાદમાં 890 અને સુરતમાં 134 બાંગ્લાદેશીઓને ઝડપી પાડવામાં આવ્યા, જેઓ બોગસ ડોક્યુમેન્ટનો ઉપયોગ કરી ભારતમાં રહેતા હતા. આ કાર્યવાહી જમ્મુ-કાશ્મીરના પહેલગામમાં તાજેતરના આતંકી હુમલાને પગલે કેન્દ્રીય સુરક્ષા એજન્સીઓના નિર્દેશ પર હાથ ધરવામાં આવી.

અમદાવાદ ક્રાઈમ બ્રાન્ચના જોઈન્ટ કમિશનર શરદ સિંઘલે જણાવ્યું કે, “ગૃહ મંત્રી, પોલીસ કમિશનર અને ડીજીપીના આદેશ અનુસાર, અમદાવાદના ચંડોળા તળાવ વિસ્તારમાં મોટી સંખ્યામાં ગેરકાયદેસર બાંગ્લાદેશીઓ રહેતા હોવાની ચોક્કસ માહિતીના આધારે શનિવારે વહેલી સવારે 2 વાગે કોમ્બિંગ ઓપરેશન હાથ ધરવામાં આવ્યું. આ ઓપરેશનમાં SOG, EOW, ઝોન-6 અને હેડક્વાર્ટરની ટીમોએ ભાગ લીધો.”

સુરતમાં, SOG, DCB, AHTU, PCB અને સ્થાનિક પોલીસની સંયુક્ત ટીમોએ ઉધના, કતારગામ, મહિધરપુરા, પાંડેસરા, સલાબતપુરા અને લિંબાયત વિસ્તારોમાં આખી રાત સર્ચ ઓપરેશન હાથ ધર્યું. SOGના ડેપ્યુટી કમિશનર રાજદીપ સિંહ નાકુમે જણાવ્યું, “આ લોકો ગેરકાયદેસર રીતે ભારતમાં પ્રવેશ્યા હતા અને બોગસ ડોક્યુમેન્ટ સાથે સુરતમાં રહેતા હતા. તપાસ બાદ તેમનું દેશનિકાલ કરવામાં આવશે.”

પોલીસ તપાસમાં બહાર આવ્યું છે કે, આ બાંગ્લાદેશી નાગરિકો મોટાભાગે પશ્ચિમ બંગાળની સરહદ થઈ ગેરકાયદેસર રીતે ભારતમાં પ્રવેશ્યા હતા અને બોગસ આધારકાર્ડ, પાનકાર્ડ અને અન્ય દસ્તાવેજોના આધારે ગુજરાત સહિત દેશના અલગ-અલગ રાજ્યોમાં રહેતા હતા. કેટલાક અટકાયત કરાયેલા લોકો ડ્રગ્સના ધંધા સાથે સંકળાયેલા હોવાનું પણ જણાયું છે, જ્યારે અગાઉ પકડાયેલા ચાર બાંગ્લાદેશીઓ અલ-કાયદા આતંકી સંગઠન સાથે જોડાયેલા હોવાનું તપાસમાં બહાર આવ્યું હતું.

ગુજરાતના ગૃહ રાજ્યમંત્રી હર્ષ સંઘવીએ આ ઓપરેશનને ઐતિહાસિક ગણાવી, સુરત અને અમદાવાદ પોલીસને અભિનંદન આપ્યા. તેમણે ચેતવણી આપતાં કહ્યું, “ગેરકાયદેસર રીતે ગુજરાતમાં રહેતા તમામ બાંગ્લાદેશીઓ આગામી બે દિવસમાં નજીકના પોલીસ સ્ટેશનમાં સરેન્ડર કરે, નહીં તો પોલીસ ઘરે-ઘરે જઈને તેમને પકડશે. આ લોકોને આશ્રય આપનારા અને બોગસ ડોક્યુમેન્ટ બનાવી આપનારા સામે પણ કડક કાર્યવાહી કરવામાં આવશે.”

આ કાર્યવાહી વડાપ્રધાન નરેન્દ્ર મોદીની અધ્યક્ષતામાં યોજાયેલી બેઠક બાદ ભારત સરકારના નિર્દેશોને અનુસરીને હાથ ધરવામાં આવી છે. કેન્દ્ર સરકારે ગેરકાયદેસર રીતે રહેતા તમામ વિદેશી નાગરિકો, ખાસ કરીને બાંગ્લાદેશી અને પાકિસ્તાની નાગરિકોના દેશનિકાલ માટે સમયમર્યાદા નક્કી કરી છે. ગુજરાત સરકારે આ સમયમર્યાદામાં આ કામગીરી પૂર્ણ કરવાની પ્રતિબદ્ધતા દર્શાવી છે.

અમદાવાદના DCP અજીત રાજિયાને જણાવ્યું, “અટકાયત કરાયેલા લોકોની ઓળખની ચકાસણી ચાલુ છે. તેમની પાસેથી મળેલા દસ્તાવેજો બોગસ હોવાનું જણાયું છે. દેશનિકાલની પ્રક્રિયા ટૂંક સમયમાં શરૂ થશે.” આ ઓપરેશનમાં ACP, DCP સહિતના અધિકારીઓ અને પોલીસ કર્મચારીઓ આખી રાત ખડેપગે રહ્યા, જેના કારણે આ કાર્યવાહી સફળ રહી.

આ ઘટનાએ રાજ્યભરમાં ચર્ચા જગાવી છે. પોલીસે નાગરિકોને શંકાસ્પદ પ્રવૃત્તિઓની જાણ કરવા અપીલ કરી છે. ગુજરાત પોલીસે સ્પષ્ટ કર્યું છે કે, આવા ઓપરેશન આગામી દિવસોમાં પણ ચાલુ રહેશે, જેથી રાજ્યમાં ગેરકાયદેસર રહેતા કોઈ પણ વિદેશી નાગરિક બાકી ન રહે.

(પ્રતિનિધિ દ્વારા)