તંત્રી શ્રી પ્રવીણભાઈ પ્રજાપતિ (પવન)

મો. 9998579515

---

બનાસકાંઠામાં ભેળસેળયુક્ત ઘી અને ખાદ્યતેલના વેચાણ સામે કડક કાર્યવાહી

નિવાસી અધિક કલેક્ટરની કોર્ટ દ્વારા ૧૪ કેસમાં કુલ રૂ. ૫૬ લાખનો દંડ ફટકારાયો

પાલનપુર | 📰 પવન એક્સપ્રેસ

બનાસકાંઠા જિલ્લામાં જાહેર જનતાના આરોગ્ય અને ખાદ્ય સુરક્ષાને ધ્યાનમાં રાખીને ખોરાક અને ઔષધ નિયમન તંત્ર, પાલનપુર દ્વારા ભેળસેળયુક્ત તેમજ નિર્ધારિત ગુણવત્તાના ધોરણોનું પાલન ન કરતા ઘી અને ખાદ્યતેલના વેચાણ સામે કડક કાર્યવાહી હાથ ધરવામાં આવી રહી છે.

ખોરાક અને ઔષધ નિયમન તંત્રના ફૂડ સેફ્ટી ઓફિસરો દ્વારા ફૂડ સેફ્ટી એન્ડ સ્ટાન્ડર્ડ્સ એક્ટ-૨૦૦૬ હેઠળ બનાસકાંઠા જિલ્લાના વિવિધ વિસ્તારોમાંથી ઘી તથા ખાદ્યતેલના નમૂનાઓ લેવામાં આવ્યા હતા. આ નમૂનાઓને પૃથક્કરણ અને ગુણવત્તાની ચકાસણી માટે સરકારી ફૂડ લેબોરેટરીમાં મોકલવામાં આવ્યા હતા.

લેબોરેટરી તપાસ દરમિયાન ફૂડ એનાલિસ્ટ દ્વારા નિર્ધારિત ધોરણો મુજબ નાપાસ જાહેર કરાયેલા નમૂનાઓના સંદર્ભે જવાબદારો સામે કાયદેસરની કાર્યવાહી કરવામાં આવી હતી. આ કેસો બનાસકાંઠા જિલ્લાના નિવાસી અધિક કલેક્ટરની કોર્ટ સમક્ષ રજૂ કરવામાં આવ્યા હતા.

કેસોની સુનાવણી બાદ કોર્ટ દ્વારા કુલ ૧૪ કેસોમાં સંલગ્ન જવાબદારો સામે દંડનીય કાર્યવાહી કરવામાં આવી છે અને કુલ **રૂ. ૫૬,૦૦,૦૦૦/- (છપ્પન લાખ રૂપિયા)**નો દંડ ફટકારવામાં આવ્યો છે.

૧૧ કેસ ઘીના નમૂનાઓ સંબંધિત

કુલ ૧૪ કેસોમાંથી ૧૧ કેસ ઘીના નમૂનાઓ સંબંધિત હતા. લેબોરેટરી તપાસમાં ઘીના નમૂનાઓમાં વનસ્પતિ ઓઇલની હાજરી જોવા મળી હતી. ઉપરાંત, આ નમૂનાઓ ઘી માટે નિયત કરાયેલા ગુણવત્તાના ધોરણો સંતોષતા ન હોવાનું જણાયું હતું. આ મામલે જવાબદારો સામે કાયદેસરની કાર્યવાહી કરી દંડ ફટકારવામાં આવ્યો છે.

૩ કેસ ખાદ્યતેલના નમૂનાઓ સંબંધિત

બાકીના ૦૩ કેસ રિફાઇન્ડ સોયાબીન ઓઇલ તથા મસ્ટર્ડ ઓઇલના નમૂનાઓ સંબંધિત હતા. લેબોરેટરી તપાસમાં આ ખાદ્યતેલના નમૂનાઓ નિર્ધારિત શુદ્ધતા અને ગુણવત્તાના ધોરણો સંતોષતા ન હોવાનું જણાતા સંબંધિત જવાબદારો સામે કાયદેસરની કાર્યવાહી કરવામાં આવી હતી.

ભેળસેળ સામે તંત્રની કાર્યવાહી યથાવત્ રહેશે

ખોરાક અને ઔષધ નિયમન તંત્ર, પાલનપુર દ્વારા બનાસકાંઠા જિલ્લામાં ખાદ્ય ચીજવસ્તુઓની ગુણવત્તા અને શુદ્ધતા જળવાઈ રહે તે માટે નિયમિત તપાસ તેમજ નમૂના લેવાની કામગીરી કરવામાં આવી રહી છે.

જાહેર જનતાને શુદ્ધ, સલામત અને ગુણવત્તાયુક્ત ખાદ્ય સામગ્રી મળી રહે તે માટે ભેળસેળયુક્ત અથવા નિર્ધારિત ધોરણોનું પાલન ન કરતી ખાદ્ય સામગ્રીનું વેચાણ કરનારાઓ સામે કાયદાની જોગવાઈઓ મુજબ કડક કાર્યવાહી કરવામાં આવશે.

ખાદ્ય વ્યવસાય સાથે સંકળાયેલા તમામ વેપારીઓ અને ઉત્પાદકોને ખાદ્ય સુરક્ષાના નિર્ધારિત ધોરણોનું પાલન કરવા તથા ગ્રાહકોને ગુણવત્તાયુક્ત અને સલામત ખાદ્ય સામગ્રી ઉપલબ્ધ કરાવવા તંત્ર દ્વારા અપીલ કરવામાં આવી છે.

---

પવન એક્સપ્રેસ

સત્યની સાથે… સમાજની વાત

તંત્રી : શ્રી પ્રવીણભાઈ પ્રજાપતિ (પવન)
મો. 9998579515