શ્રી યુ. એચ. ચૌધરી આર્ટ્સ કૉલેજ, વડગામમાં વિશ્વ ઉદ્યોગ સાહસિકતા દિવસની ઉજવણી

વિદ્યાર્થીઓમાં ઉદ્યોગ સાહસિકતા, સ્વાવલંબન અને રોજગાર સર્જન અંગે જાગૃતિ કેળવવાનો પ્રયાસ

પવન એક્સપ્રેસ | વડગામ

વડગામ, તા. 22 ઓગસ્ટ: વડગામ સ્થિત શ્રી યુ. એચ. ચૌધરી આર્ટ્સ કૉલેજ ખાતે એન.એસ.એસ. વિભાગ દ્વારા તા. 22 ઓગસ્ટ, 2026ના રોજ  “વિશ્વ ઉદ્યોગ સાહસિકતા દિવસ” ની ઉજવણી કરવામાં આવી હતી. કાર્યક્રમનો મુખ્ય હેતુ વિદ્યાર્થીઓમાં ઉદ્યોગ સાહસિકતા, નવીનતા, સ્વાવલંબન તથા રોજગાર સર્જન અંગે જાગૃતિ કેળવવાનો હતો.

આ સમગ્ર કાર્યક્રમનું આયોજન કોલેજના ડૉ. લક્ષ્મણભાઈ ગોળ સાહેબની પ્રેરણાથી કરવામાં આવ્યું હતું. કાર્યક્રમને સફળ બનાવવા માટે એન.એસ.એસ.ના પ્રોગ્રામ ઓફિસર ડૉ. રમેશભાઈ એચ. ચૌધરી તેમજ સહઅધ્યાપક ડૉ. મોતીભાઈ એચ. ચૌધરીનું માર્ગદર્શન અને સહયોગ પ્રાપ્ત થયો હતો.

વિદ્યાર્થીઓને ઉદ્યોગ સાહસિકતા અંગે માર્ગદર્શન

કાર્યક્રમ અંતર્ગત “વિશ્વ ઉદ્યોગ સાહસિકતા દિવસ” વિષય પર વિશેષ વ્યાખ્યાનનું આયોજન કરવામાં આવ્યું હતું. જેમાં ડૉ. દશરથભાઈ જગાણીયાએ વિદ્યાર્થીઓને ઉદ્યોગ સાહસિકતાનું મહત્વ, સ્વરોજગારની તકો, સ્ટાર્ટઅપ, નવીન વિચારો, આત્મનિર્ભરતા તેમજ આજના સમયમાં યુવાનોની ઉદ્યોગ સાહસિક તરીકેની ભૂમિકા અંગે વિસ્તૃત માર્ગદર્શન આપ્યું હતું.

વ્યાખ્યાન દરમિયાન વિદ્યાર્થીઓને માત્ર નોકરી શોધનાર નહીં, પરંતુ નોકરીનું સર્જન કરનાર બનવા માટે પ્રેરિત કરવામાં આવ્યા હતા. સાથે જ પોતાના નવીન વિચારોને વ્યવસાયિક સ્વરૂપ આપીને સ્વાવલંબી બનવા તથા આત્મનિર્ભર ભારતના નિર્માણમાં સક્રિય યોગદાન આપવા અંગે પણ માર્ગદર્શન આપવામાં આવ્યું હતું.

વિદ્યાર્થીઓએ ઉત્સાહપૂર્વક ભાગ લીધો

કાર્યક્રમમાં કોલેજના પ્રાધ્યાપકશ્રીઓ, એન.એસ.એસ.ના સ્વયંસેવકો તેમજ વિદ્યાર્થીઓએ ઉત્સાહપૂર્વક ભાગ લીધો હતો. સમગ્ર કાર્યક્રમનું સફળ આયોજન એન.એસ.એસ. વિભાગ દ્વારા કરવામાં આવ્યું હતું.

આ પ્રસંગે વિદ્યાર્થીઓને આજના સ્પર્ધાત્મક યુગમાં નવીન વિચારસરણી, સાહસ, કૌશલ્ય અને આત્મવિશ્વાસ સાથે આગળ વધીને પોતાના માટે તેમજ અન્ય લોકો માટે રોજગારની તકો ઊભી કરવાની પ્રેરણા મળી હતી.

— પવન એક્સપ્રેસ | વડગામ