📰 પવન એક્સપ્રેસ
નવસારીમાં રૂ.40 હજારની લાંચ લેતા મદદનીશ ઇજનેર રંગેહાથ ઝડપાયા
તપાસ દરમિયાન નાયબ કાર્યપાલક ઇજનેરની પણ સંડોવણી સામે આવી, ACBએ બંનેને ઝડપી પાડ્યા
નવસારી, તા. 11 સપ્ટેમ્બર 2026
નવસારીમાં ભ્રષ્ટાચાર વિરોધી બ્યુરો (ACB) દ્વારા લાંચિયા અધિકારીઓ સામે કાર્યવાહી કરવામાં આવી છે. ગુજરાત રાજ્ય પોલીસ આવાસ નિગમ લિમિટેડના બે ઇજનેરો સામે કરવામાં આવેલી કાર્યવાહીમાં કરાર આધારિત મદદનીશ ઇજનેર રૂ.40 હજારની લાંચ સ્વીકારતા રંગેહાથ ઝડપાયા હતા. ત્યારબાદ હાથ ધરાયેલી તપાસમાં નાયબ કાર્યપાલક ઇજનેરની કથિત સંડોવણી પણ સામે આવતા તેમને પણ ઝડપી લેવામાં આવ્યા હતા.
સરકારી કામના બિલની મંજૂરી માટે લાંચની માંગ
મળતી માહિતી મુજબ, ફરિયાદીએ સરકારી ટેન્ડર હેઠળ કંપાઉન્ડ દિવાલનું કામ પૂર્ણ કર્યું હતું. આ કામના બિલની રકમ મંજૂર કરવાની કાર્યવાહી માટે આરોપીઓ દ્વારા શરૂઆતમાં રૂ.50 હજારની લાંચની માંગ કરવામાં આવી હોવાનો ACBનો દાવો છે.
ફરિયાદી લાંચ આપવા ઇચ્છતા ન હોવાથી તેમણે ACBનો સંપર્ક કરી સમગ્ર મામલે ફરિયાદ નોંધાવી હતી. ફરિયાદના આધારે ACB દ્વારા લાંચનું છટકું ગોઠવવામાં આવ્યું હતું.
રૂ.40 હજાર સ્વીકારતા જ રંગેહાથ ઝડપાયા
તા. 10 સપ્ટેમ્બર 2026ના રોજ સુરત ખાતે ગુજરાત રાજ્ય પોલીસ આવાસ નિગમ લિમિટેડના કાર્યપાલક ઇજનેરની કચેરી નજીક નર્મદનગર સોસાયટીના મકાન નં.33 સામે ACB દ્વારા ટ્રેપ ગોઠવવામાં આવ્યો હતો.
ટ્રેપ દરમિયાન નવસારીની પેટા વિભાગીય કચેરીમાં કરાર આધારિત મદદનીશ ઇજનેર તરીકે ફરજ બજાવતા નયન રાજાભાઈ બલદાણિયા દ્વારા ફરિયાદી પાસેથી રૂ.40 હજારની લાંચની રકમ માંગીને સ્વીકારવામાં આવી હોવાનો ACBનો દાવો છે. રકમ સ્વીકારતાની સાથે જ ACBની ટીમે તેમને રંગેહાથ ઝડપી પાડ્યા હતા. ટ્રેપ દરમિયાન લાંચની સંપૂર્ણ રૂ.40 હજારની રકમ પણ રિકવર કરવામાં આવી હતી.
તપાસમાં નાયબ કાર્યપાલક ઇજનેરનું નામ સામે આવ્યું
મદદનીશ ઇજનેરની ધરપકડ બાદ ACB દ્વારા આગળની તપાસ હાથ ધરવામાં આવી હતી. તપાસ દરમિયાન ગુજરાત રાજ્ય પોલીસ આવાસ નિગમ લિમિટેડના વર્ગ-2 નાયબ કાર્યપાલક ઇજનેર બ્રિજેશભાઈ રમેશભાઈ ગોંડલીયાની કથિત સંડોવણી સામે આવી હતી.
આથી ACBએ બ્રિજેશભાઈ ગોંડલીયાને પણ ઝડપી પાડ્યા હતા. બંને આરોપીઓ સામે કાયદેસરની કાર્યવાહી હાથ ધરવામાં આવી રહી છે.
સુરત શહેર ACBની ટીમે કરી કાર્યવાહી
આ સમગ્ર ટ્રેપની કાર્યવાહી સુરત શહેર ACB પોલીસ સ્ટેશનના પોલીસ ઇન્સ્પેક્ટર કે.જે. ધડુક તથા તેમની ટીમ દ્વારા કરવામાં આવી હોવાનું અહેવાલોમાં જણાવાયું છે. મામલે વધુ તપાસ હાથ ધરવામાં આવી રહી છે.
પવન એક્સપ્રેસ
તંત્રી શ્રી પ્રવીણભાઈ પ્રજાપતિ (પવન)
મો. 9998579515
Discover more from Pavan Express News
Subscribe to get the latest posts sent to your email.