શ્રી યુ. એચ. ચૌધરી આર્ટ્સ કૉલેજ, વડગામમાં NSS વિભાગ દ્વારા સ્વચ્છતા અભિયાન અને નિબંધ સ્પર્ધાનું આયોજન

સ્વચ્છતા પ્રત્યે જાગૃતિ સાથે વિદ્યાર્થીઓએ નિબંધ સ્પર્ધામાં ઉત્સાહપૂર્વક ભાગ લીધો

પવન એક્સપ્રેસ | વડગામ

વડગામ, તા. 20 ઓગસ્ટ: શ્રી યુ. એચ. ચૌધરી આર્ટ્સ કૉલેજ, વડગામ ખાતે તા. 19 ઓગસ્ટ, 2026ના બુધવારના રોજ ડૉ. લક્ષ્મણભાઈ વી. ગોળના માર્ગદર્શન હેઠળ NSS વિભાગ દ્વારા સ્વચ્છતા અભિયાન તેમજ નિબંધ સ્પર્ધાનું આયોજન કરવામાં આવ્યું હતું.

કાર્યક્રમનું આયોજન NSS પ્રોગ્રામ ઓફિસર ડૉ. રમેશભાઈ એચ. ચૌધરી તથા સહઅધ્યાપક ડૉ. મોતીભાઈ એચ. ચૌધરીના માર્ગદર્શન અને આયોજન હેઠળ કરવામાં આવ્યું હતું.

સ્વચ્છતા અભિયાન અંતર્ગત NSSના સ્વયંસેવકો દ્વારા કૉલેજ પરિસરમાં શ્રમદાન કરી સ્વચ્છતા જાળવવાનો સંદેશ આપવામાં આવ્યો હતો. વિદ્યાર્થીઓએ ઉત્સાહપૂર્વક ભાગ લઈ સ્વચ્છતા પ્રત્યે જાગૃતિ અને સામાજિક જવાબદારીનું ઉત્તમ ઉદાહરણ પૂરું પાડ્યું હતું.

આ સાથે વિદ્યાર્થીઓમાં સર્જનાત્મકતા, વિચારશક્તિ અને સામાજિક જાગૃતિનો વિકાસ થાય તે હેતુથી નિબંધ સ્પર્ધાનું પણ આયોજન કરવામાં આવ્યું હતું. જેમાં વિદ્યાર્થીઓએ ‘સ્વચ્છ ગુજરાત’, ‘સ્વચ્છ ભારત’, ‘દેશપ્રેમ’ અને ‘રાષ્ટ્ર નિર્માણમાં યુવાનોની ભૂમિકા’ જેવા વિવિધ સામાજિક અને સમકાલીન વિષયો પર પોતાના વિચારો રજૂ કર્યા હતા.

સમગ્ર કાર્યક્રમ દરમિયાન NSSના સ્વયંસેવકો અને વિદ્યાર્થીઓએ ઉત્સાહભેર ભાગ લીધો હતો. કાર્યક્રમના અંતે સ્વચ્છ અને સ્વસ્થ સમાજના નિર્માણમાં દરેક વ્યક્તિએ પોતાની જવાબદારી નિભાવવાનો સંકલ્પ કર્યો હતો.

કૉલેજ ખાતે યોજાયેલ આ સમગ્ર કાર્યક્રમ દ્વારા વિદ્યાર્થીઓમાં સ્વચ્છતા, સામાજિક જવાબદારી, દેશપ્રેમ અને રાષ્ટ્ર નિર્માણની ભાવનાને વધુ મજબૂત બનાવવાનો પ્રયાસ કરવામાં આવ્યો હતો.

— પવન એક્સપ્રેસ, વડગામ