📰 પવન એક્સપ્રેસ

ડીસાના CSC VLE મિત્રો દ્વારા અંબાજી પદયાત્રીઓને રૂમાલ વિતરણ

ભાદરવી પૂનમના મેળામાં જતા પદયાત્રીઓને ગરમીથી રાહત મળે તેવા સેવાભાવી ઉદ્દેશ્ય સાથે કોટનના રૂમાલનું વિતરણ

ડીસા: ભાદરવી પૂનમના પવિત્ર મેળાને લઈ બનાસકાંઠા સહિત સમગ્ર ઉત્તર ગુજરાતમાંથી મોટી સંખ્યામાં શ્રદ્ધાળુઓ પગપાળા અંબાજી તરફ પ્રયાણ કરી રહ્યા છે. ત્યારે માર્ગમાં પદયાત્રીઓને જરૂરી સુવિધા અને રાહત મળી રહે તે માટે વિવિધ સેવાભાવી સંસ્થાઓ તેમજ સેવાભાવી લોકો દ્વારા સેવા પ્રવૃત્તિઓ હાથ ધરવામાં આવી રહી છે.

આ સેવાકીય પ્રવૃત્તિના ભાગરૂપે ડીસાના CSC (કોમન સર્વિસ સેન્ટર) VLE મિત્રો તરફથી અંબાજી પદયાત્રીઓ માટે રૂમાલ વિતરણનું આયોજન કરવામાં આવ્યું હતું. ડીસા ખાતે ધરમ ઇન્ફોટેકના ધર્મેન્દ્રકુમાર અજયભાઈ પ્રજાપતિની ટીમ દ્વારા અંબાજી ખાતે ભાદરવી પૂનમનો મેળો ભરવા જઈ રહેલા પદયાત્રીઓને કોટનના રૂમાલનું વિતરણ કરવામાં આવ્યું હતું.

ભાદરવી પૂનમના મેળા દરમિયાન ઉત્તર ગુજરાતમાં ગરમી અને ઉકળાટ વચ્ચે લાંબી પદયાત્રા કરતા શ્રદ્ધાળુઓને પરસેવો થતો હોય છે. આવી પરિસ્થિતિમાં રૂમાલ પદયાત્રીઓ માટે ઉપયોગી બની રહે તેવા હેતુથી આ સેવાકાર્ય હાથ ધરાયું હતું. પદયાત્રીઓ પરસેવો લૂછવા ઉપરાંત હાથ-પગ ધોયા બાદ પણ આ રૂમાલનો ઉપયોગ કરી શકે તેવા ઉદ્દેશ્ય સાથે કોટનના રૂમાલનું વિતરણ કરવામાં આવ્યું હતું.

CSC VLE મિત્રો દ્વારા કરવામાં આવેલી આ નાનકડી પરંતુ ઉપયોગી સેવા બદલ પદયાત્રીઓમાં પણ આનંદ જોવા મળ્યો હતો. સેવા કાર્ય દરમિયાન ટીમના સભ્યોએ પદયાત્રીઓને રૂમાલ આપી તેમની અંબાજીની યાત્રા સુખદ અને સુખાકારીપૂર્ણ રહે તેવી શુભેચ્છાઓ પાઠવી હતી.

ભાદરવી પૂનમના મેળા દરમિયાન અંબાજી તરફ જતા માર્ગો પર અનેક સેવાભાવી લોકો દ્વારા પાણી, નાસ્તો, ચા, આરોગ્ય સેવા સહિતની વિવિધ સેવાઓ કરવામાં આવી રહી છે. ત્યારે ડીસાના CSC VLE મિત્રો દ્વારા કરવામાં આવેલું રૂમાલ વિતરણ પણ પદયાત્રીઓ માટે ઉપયોગી સેવા બની રહ્યું છે.

સેવા એ જ સાચી ભક્તિ — આ ભાવના સાથે કરવામાં આવેલી આ સેવા પ્રવૃત્તિએ ભક્તિ સાથે માનવસેવાનો સુંદર સંદેશો આપ્યો હતો.

તસવીર અહેવાલ : પવન એક્સપ્રેસ

📰 પવન એક્સપ્રેસ
તંત્રી શ્રી પ્રવીણભાઈ પ્રજાપતિ (પવન)
મો. 9998579515