પાલનપુર પ્રજાપતિ સમાજ દ્વારા ભાદરવા સુદ દશમના પવિત્ર દિવસે અંબાજી માતાને થાળ ધરાવી પ્રસાદી કરાઈ

નવાબી કાળથી ચાલી આવતી પરંપરા આજે પણ યથાવત્: કસ્બાના પ્રજાપતિ પરિવારો એકત્ર થઈ માતાજીની આરતી અને પ્રસાદીનો લાભ લીધો

પાલનપુર:
પાલનપુર શહેરમાં વસતા કસ્બાના પ્રજાપતિ સમાજ દ્વારા વર્ષોથી ચાલી આવતી ધાર્મિક અને પરંપરાગત પ્રથાને જાળવી રાખતાં આજે ભાદરવા સુદ દશમ, સોમવારના પવિત્ર દિવસે પાલનપુર ખાતે આવેલા અંબાજી માતાના મંદિરે સામૂહિક રીતે થાળ ધરાવી પ્રસાદીનો કાર્યક્રમ યોજાયો હતો.

પ્રજાપતિ સમાજના પરિવારો પોતાના ઘરેથી શ્રદ્ધાપૂર્વક લાડુનો પ્રસાદ તેમજ દીવો લઈને અંબાજી માતાના મંદિરે પહોંચ્યા હતા. તમામ પરિવારો એકત્ર થયા બાદ માતાજીની આરતી કરવામાં આવી હતી અને માતાજીને થાળ ધરાવી પ્રસાદ અર્પણ કરવામાં આવ્યો હતો. ત્યારબાદ સમગ્ર પ્રજાપતિ પરિવારજનોએ સાથે મળીને પ્રસાદી ગ્રહણ કરી હતી.

નવાબી કાળથી ચાલી આવતી પરંપરા

સમાજના વડીલોના જણાવ્યા મુજબ, આ પરંપરા પાલનપુરના નવાબી કાળથી ચાલી આવતી હોવાનું માનવામાં આવે છે. પાલનપુરમાં અંબાજી માતાના મંદિરની સ્થાપના થઈ ત્યારથી જ કસ્બામાં વસતા પ્રજાપતિ પરિવારો દ્વારા સામૂહિક રીતે માતાજીની આરાધના, આરતી અને પ્રસાદી કરવાની પરંપરા શરૂ થઈ હતી, જે આજે પણ શ્રદ્ધા અને ભક્તિભાવ સાથે જાળવી રાખવામાં આવી છે.

વડીલોના જણાવ્યા મુજબ અગાઉના સમયમાં કસ્બામાં વસતા પ્રજાપતિ પરિવારો વહેલી સવારે અંબાજી માતાના મંદિરે પહોંચતા. ઘરેથી પ્રસાદ લઈને આવી માતાજીને થાળ ધરાવતા, આરતી કરતા અને ત્યારબાદ આખો દિવસ માતાજીના ચરણોમાં ભક્તિભાવપૂર્વક વિતાવતા. સાંજે પરિવારજનો પોતાના ઘરે પરત ફરતા.

સમય બદલાતાં આ પરંપરાના સ્વરૂપમાં થોડો ફેરફાર થયો છે, પરંતુ માતાજી પ્રત્યેની શ્રદ્ધા અને પરંપરાની ભાવના આજે પણ અવિરત છે. આજે પણ પ્રજાપતિ સમાજના પરિવારો એકત્ર થઈ માતાજીની આરતી કરી થાળ ધરાવે છે અને ત્યારબાદ સામૂહિક પ્રસાદી ગ્રહણ કરે છે.

વડીલો સાથે નાના ભૂલકાઓએ પણ લીધો ભાગ

આ ધાર્મિક પ્રસંગે પ્રજાપતિ સમાજના વડીલો, પરિવારના સભ્યો, મહિલાઓ તેમજ નાના ભૂલકાઓ મોટી સંખ્યામાં ઉપસ્થિત રહ્યા હતા. સમગ્ર વાતાવરણ માતાજીની ભક્તિ, આરતી અને સામૂહિક પ્રસાદીના ભાવથી ભક્તિમય બની ગયું હતું.

આ પ્રસંગે નવી પેઢીને પણ સમાજની વર્ષો જૂની પરંપરા અને સંસ્કૃતિ સાથે જોડવાનો સુંદર સંદેશ મળ્યો હતો. પ્રજાપતિ સમાજ દ્વારા પેઢી દર પેઢી ચાલી આવતી આ પરંપરા આજે પણ એકતા, શ્રદ્ધા અને સામાજિક સંવાદિતાનું પ્રતિક બની રહી છે.

— પવન એક્સપ્રેસ, પાલનપુર
https://youtu.be/5J90g9mO3eE?si=5h32Mb67HIqXvBzs