પવન એક્સપ્રેસ

નારી સંરક્ષણ કેન્દ્ર, પાલનપુર ખાતે રક્ષાબંધનની હર્ષોલ્લાસભેર ઉજવણી

‘નારી શક્તિ સાથે રક્ષાબંધન’ — બહેનોએ પોતાના હાથે રાખડી બાંધી ભાઈ-બહેનના પવિત્ર સંબંધની લાગણી વ્યક્ત કરી

પાલનપુર: રક્ષાબંધનના પવિત્ર પર્વ નિમિત્તે પાલનપુરના નારી સંરક્ષણ કેન્દ્ર ખાતે ‘નારી શક્તિ સાથે રક્ષાબંધન’ની ભાવસભર ઉજવણી કરવામાં આવી હતી. નારી સંરક્ષણ કેન્દ્રના આયોજન મેનેજર નિલોફરબેનના માર્ગદર્શન હેઠળ યોજાયેલા આ કાર્યક્રમમાં આશ્રિત બહેનો અને ઉપસ્થિત મહેમાનો વચ્ચે લાગણીસભર વાતાવરણ સર્જાયું હતું.

કાર્યક્રમ દરમિયાન નારી સંરક્ષણ કેન્દ્રની બહેનોએ પોતાના હાથે જીવદયા ફાઉન્ડેશનના જીવદયા પ્રેમી ઠાકોરદાસ ખત્રીને રાખડી બાંધી હતી. રાખડી બાંધી બહેનોએ ભાઈ-બહેનના પવિત્ર સંબંધની લાગણી વ્યક્ત કરી હતી અને આ અનોખી ઉજવણીમાં સહભાગી બની ધન્યતા અનુભવી હતી.

આ ઉપરાંત પિન્કીબેન પ્રજાપતિ, ઘનશ્યામભાઈ ખત્રી, ધનેશભાઈ રેડિયમ પટ્ટીવાળા તથા તારાબેન પ્રજાપતિને પણ નારી સંરક્ષણ કેન્દ્રની બહેનોએ રાખડી બાંધી હતી. ઉપસ્થિત સૌએ બહેનોના પ્રેમ અને લાગણીને સ્વીકારી રક્ષાબંધનના પર્વની શુભેચ્છાઓ પાઠવી હતી.

રક્ષાબંધન સાથે જન્મદિવસની પણ ઉજવણી

આ કાર્યક્રમની ખાસ વાત એ રહી કે આ જ દિવસે જીવદયા ફાઉન્ડેશનના પિન્કીબેન પ્રજાપતિનો જન્મદિવસ પણ હતો. તેથી રક્ષાબંધનની ઉજવણી સાથે તેમનો જન્મદિવસ પણ કેક કાપીને આનંદપૂર્વક ઉજવવામાં આવ્યો હતો.

આ પ્રસંગે નારી સંરક્ષણ કેન્દ્રની બહેનો માટે કેક તથા વેફર સહિતના નાસ્તાની વ્યવસ્થા કરવામાં આવી હતી. જન્મદિવસ અને રક્ષાબંધન એમ બંને પ્રસંગો એકસાથે ઉજવાતા કાર્યક્રમમાં ખુશી અને ઉત્સાહનો માહોલ જોવા મળ્યો હતો.

નારી શક્તિ સાથે ઉજવણીનો સુંદર સંદેશ

રક્ષાબંધન માત્ર રાખડી બાંધવાનો તહેવાર નથી, પરંતુ પ્રેમ, લાગણી, સ્નેહ, વિશ્વાસ અને સુરક્ષાના પવિત્ર બંધનનું પ્રતીક છે. નારી સંરક્ષણ કેન્દ્ર ખાતે આ પર્વની ઉજવણી કરીને સમાજમાં નારી સન્માન અને નારી શક્તિનો સુંદર સંદેશ આપવામાં આવ્યો હતો.

કાર્યક્રમના અંતે નારી સંરક્ષણ કેન્દ્રના મેનેજર નિલોફરબેને ઉપસ્થિત મહેમાનો, સ્ટાફ તેમજ આશ્રિત બહેનોનો આભાર વ્યક્ત કર્યો હતો. તેમણે જણાવ્યું હતું કે, નારી શક્તિ સાથે રક્ષાબંધનની ઉજવણી કરવી ખરેખર ગર્વની વાત છે. આ પ્રસંગે ઠાકોરદાસભાઈ અને જીવદયા ફાઉન્ડેશન દ્વારા આપવામાં આવેલ સહયોગ ખૂબ જ પ્રેરણાદાયી રહ્યો હતો.

રક્ષાબંધનના પવિત્ર પર્વે યોજાયેલી આ ભાવસભર ઉજવણીએ સેવા, સ્નેહ અને સામાજિક સંવેદનશીલતાનો સુંદર સંદેશ આપ્યો હતો.