યુવકે ધો-10ની નકલી માર્કશીટના આધારે પાસપોર્ટ મેળવવાનો પ્રયાસ કરતાં ફરિયાદ

પાલનપુરના એક યુવકે ધોરણ-10ની નકલી માર્કશીટના આધારે પાસપોર્ટ મેળવવાનો પ્રયાસ કર્યો હતો. માર્કશીટ રાષ્ટ્રીય મુક્ત વિદ્યાલય શિક્ષા સંસ્થાન દ્વારા ઈશ્યુ થયેલી હોવાનું બતાવાયું હતું. યુવકે પાસપોર્ટ માટે અરજી કરી ત્યારે પાસપોર્ટ ઓફિસે માર્કશીટ પરનો ક્યૂઆર કોડ સ્કેન કર્યો. સ્કેન કરતા કોઈ માહિતી ન મળતાં શંકા ઊભી થઈ. તપાસ કરતા નકલી માર્કશીટ હોવાનો ખુલાસો થયો છે. પાલનપુરના મહેશ્વરી હોલ પાસે આવેલ હરિઓમ સોસાયટીમાં રહેતા ધ્રુવ દિનેશભાઈ પ્રજાપતીએ 30-10-2024 નાં રોજ વિદેશ જવા પાસપોર્ટ મેળવવા અરજી કરી હતી. જેથી તેઓ 24 નવેમ્બર 2023 ના રોજ અમદાવાદના મીઠાખળી પાસપોર્ટ સેવા કેન્દ્રમાં હાજરી આપી હતી. અરજી સાથે તેણે ધોરણ-10ની માર્કશીટ સહિતના ડોક્યુમેન્ટ્સ રજુ કર્યા હતા. આ તમામ ડોક્યુમેન્ટ્સની નકલ પાસપોર્ટ ઓફિસ, ગુલબાઈ ટેકરા, અમદાવાદ મોકલવામાં આવી હતી. અરજીની તપાસ દરમિયાન ધ્રુવ પ્રજાપતી દ્વારા રજુ કરાયેલ ધોરણ-10ની માર્કશીટ રાષ્ટ્રીય મુક્ત વિદ્યાલય શિક્ષા સંસ્થાન (NIOS)ની હોવાનું જણાયું હતું. પરંતુ માર્કશીટ પરનો ક્યુઆર કોડ સ્કેન કરતાં કોઈ માહિતી મળી ન હતી. જે બાદ NIOSની વેબસાઈટ પર રોલ નંબર દાખલ કરતાં પણ કોઈ રેકોર્ડ મળ્યો ન હતો. જેથી 29 ફેબ્રુઆરી, 2024ના રોજ પાસપોર્ટ ઓફિસે NIOSના ડિરેક્ટરને રિપોર્ટ મોકલ્યો હતો. તેનો જવાબ 27 માર્ચ 2024ના રોજ મળ્યો હતો. જેમાં સ્પષ્ટ જણાવાયું હતું કે, ધ્રુવ પ્રજાપતીના નામે ધોરણ-10 ની કોઈ પણ માર્કશીટ જારી કરવામાં આવી નથી. રજુ કરાયેલ માર્કશીટ ખોટી છે. જેથી અમદાવાદ પોસ્ટ ઓફિસ દ્વારા 10-10-2024 ના રોજ બનાસકાંઠા પોલીસ અધિક્ષકને ધ્રુવ પ્રજાપતિ વિરુદ્ધ કાયદેસરની કાર્યવાહી કરવા પત્ર લખ્યો હતો. જેથી મંગળવારે અમદાવાદ પાસપોર્ટ ઓફિસના આસિસ્ટન્ટ સુપ્રિટેન્ડન્ટ અંકિત રામપ્રકાશ ભાર્ગવે પાલનપુર પૂર્વ પોલીસમાં ફરિયાદ નોંધાવી હતી.