સેલ્યુટ તિરંગા રાષ્ટ્રવાદી સંગઠનના રાષ્ટ્રીય અધિવેશનમાં ગુજરાત પ્રદેશની નોંધપાત્ર ભાગીદારી; દિલ્હીમાં ‘રાષ્ટ્ર ગૌરવ’ પુસ્તિકાનું વિમોચન, પાલનપુર પરત ફરતા ભવ્ય સ્વાગત

રાષ્ટ્રીય અધિવેશન, તિરંગા યાત્રા અને ગંગા આરતી પૂર્ણ કરી પાલનપુર પરત ફરેલા પ્રતિનિધિઓનું ભવ્ય સ્વાગત

પાલનપુર: શુક્રવારે યોજાયેલા રાષ્ટ્રીય અધિવેશન, તિરંગા યાત્રા તેમજ ગંગા આરતીના કાર્યક્રમમાં સહભાગી બની પાલનપુર પરત ફરેલા પ્રતિનિધિઓનું પાલનપુર શહેર રેલવે સ્ટેશન ખાતે સેલ્યુટ તિરંગા સંગઠનના હોદ્દેદારો અને કાર્યકરો દ્વારા ઉષ્માભર્યું સ્વાગત કરવામાં આવ્યું હતું.

સેલ્યુટ તિરંગા રાષ્ટ્રવાદી સંગઠનના રાષ્ટ્રીય અધિવેશનમાં ગુજરાત પ્રદેશની નોંધપાત્ર ભાગીદારી; દિલ્હીમાં ‘રાષ્ટ્ર ગૌરવ’ પુસ્તિકાનું વિમોચન, પાલનપુર પરત ફરતા ભવ્ય સ્વાગત

પાલનપુર: સેલ્યુટ તિરંગા રાષ્ટ્રવાદી સંગઠન દ્વારા તા. 21 જુલાઈ, 2026ના રોજ આયોજિત રાષ્ટ્રીય અધિવેશન તેમજ તા. 22 જુલાઈ, 2026ના રોજ યોજાયેલી ભવ્ય તિરંગા યાત્રા અને તિરંગા ગંગા આરતીના રાષ્ટ્રીય કાર્યક્રમમાં ગુજરાત પ્રદેશના પ્રતિનિધિમંડળે ઉત્સાહપૂર્વક ભાગ લીધો હતો.

ગુજરાત પ્રદેશ તરફથી રાષ્ટ્રીય ઉપાધ્યક્ષ એડ. પ્રતિભાબેન દેસાઈ, સિનિયર નેશનલ વાઈસ પ્રેસિડેન્ટ અંબાલાલ પટેલ, ગુજરાત પ્રદેશ અધ્યક્ષ હરગોવિંદ વાલમિયા, પ્રદેશ ઉપાધ્યક્ષ કૈલાશભાઈ ખંડેલવાલ તથા ગાંધીનગર જિલ્લાના પ્રમુખ હર્ષવર્ધન રાવલ ઉપસ્થિત રહ્યા હતા.

કાર્યક્રમ દરમિયાન ગુજરાત પ્રદેશ દ્વારા તૈયાર કરવામાં આવેલી ‘રાષ્ટ્ર ગૌરવ’ નામની પુસ્તિકાનું દિલ્હીમાં રાષ્ટ્રીય સ્તરે વિમોચન કરવામાં આવ્યું હતું. આ પુસ્તિકાને ભારતના વિવિધ રાજ્યો સુધી પહોંચાડવાનો સંકલ્પ વ્યક્ત કરવામાં આવ્યો હતો. ગુજરાત પ્રદેશની આ નોંધપાત્ર કામગીરીની સમગ્ર દેશના સેલ્યુટ તિરંગા સંગઠન દ્વારા પ્રશંસા કરવામાં આવી હતી અને ગુજરાત પ્રદેશની વિશેષ નોંધ લેવામાં આવી હતી.

રાષ્ટ્રીય કાર્યક્રમ પૂર્ણ કરીને પાલનપુર પરત ફરેલા પ્રતિનિધિઓનું પાલનપુર શહેર રેલવે સ્ટેશન ખાતે સેલ્યુટ તિરંગા સંગઠનના હોદ્દેદારો અને કાર્યકરો દ્વારા ઉષ્માભર્યું સ્વાગત કરવામાં આવ્યું હતું. ભારત માતાના જયઘોષ વચ્ચે ફૂલહાર પહેરાવી પ્રતિનિધિઓનું સન્માન કરવામાં આવ્યું હતું. સમગ્ર રેલવે સ્ટેશન દેશભક્તિના નારાઓથી ગુંજી ઉઠ્યું હતું અને કાર્યકરોએ ઉત્સાહપૂર્વક આગેવાનોનું અભિવાદન કર્યું હતું.

આ પ્રસંગે રાષ્ટ્રીય એકતા, રાષ્ટ્રપ્રેમ અને તિરંગાના ગૌરવને વધુ મજબૂત બનાવવાના સંકલ્પને પુનઃદોહરાવવામાં આવ્યો હતો. સંગઠનના હોદ્દેદારોએ જણાવ્યું હતું કે દેશભક્તિની ભાવના જન-જન સુધી પહોંચે તે માટે ભવિષ્યમાં પણ આવા રાષ્ટ્રીય કાર્યક્રમોનું સતત આયોજન કરવામાં આવશે.

આ સ્વાગત સમારોહમાં સેલ્યુટ તિરંગા સંગઠનના હોદ્દેદારો, કાર્યકરો તથા મોટી સંખ્યામાં દેશપ્રેમી નાગરિકો ઉપસ્થિત રહ્યા હતા.