📰 પવન એક્સપ્રેસ

રૂ.10 હજારની લાંચ લેતા આજી ડેમ પોલીસ સ્ટેશનના ASI સહિત બે ઝડપાયા

ટોલ ફ્રી નંબર 1064 પર મળેલી ફરિયાદના આધારે ACBની કાર્યવાહી

રાજકોટ : ટોલ ફ્રી નંબર 1064 ઉપર મળેલી ફરિયાદના આધારે લાંચ વિરોધી બ્યુરો (ACB) દ્વારા રાજકોટ શહેરમાં લાંચના કેસમાં કાર્યવાહી કરવામાં આવી હતી. જેમાં આજી ડેમ પોલીસ સ્ટેશન, રાજકોટ શહેર ખાતે ફરજ બજાવતા એક એ.એસ.આઇ. તથા જી.આર.ડી. જવાનને રૂ.10,000ની લાંચ લેતા ઝડપી પાડવામાં આવ્યા હતા.

ACBની કાર્યવાહી દરમિયાન (1) એ.એસ.આઇ. રાજેશભાઈ ઉર્ફે રાજુભાઈ સામતભાઈ મેર તથા (2) જી.આર.ડી. મનોજભાઈ બાબુભાઈ ચૌહાણ લાંચની રકમ સ્વીકારતા ઝડપાયા હતા.

મળતી માહિતી મુજબ, ફરિયાદી વિરુદ્ધ આજી ડેમ પોલીસ સ્ટેશનમાં ફરિયાદ દાખલ થયેલી હતી. આ ગુનાની તપાસના કામે આરોપીઓને લોકઅપમાં નહીં રાખવા તેમજ તેમની વહેલી તકે જામીનની કાર્યવાહી કરવાના અવેજ પેટે બંને આરોપીઓએ ફરિયાદી પાસે રૂ.10,000ની લાંચની માંગણી કરી હતી.

ફરિયાદીએ આ અંગે લાંચ વિરોધી બ્યુરોનો સંપર્ક કરતા સમગ્ર મામલે કાર્યવાહી હાથ ધરવામાં આવી હતી. ટોલ ફ્રી નંબર 1064 ઉપર મળેલી ફરિયાદના આધારે ACBની ટીમે છટકું ગોઠવી લાંચની રકમ સ્વીકારતા બંને આરોપીઓને ઝડપી પાડ્યા હતા.

આ સમગ્ર કાર્યવાહી બાદ ACB દ્વારા કાયદેસરની આગળની કાર્યવાહી હાથ ધરવામાં આવી છે. લાંચ અને ભ્રષ્ટાચાર સામેની કામગીરી અંતર્ગત ટોલ ફ્રી નંબર 1064 પર મળતી ફરિયાદોના આધારે ACB દ્વારા કાર્યવાહી કરવામાં આવે છે.

નોંધ : લાંચના કેસમાં આરોપી હોવું એ કોર્ટ દ્વારા દોષિત ઠર્યા સમાન નથી. કેસની અંતિમ સ્થિતિ કોર્ટની કાર્યવાહી બાદ નક્કી થશે.

---

📰 પવન એક્સપ્રેસ
તંત્રી શ્રી પ્રવીણભાઈ પ્રજાપતિ (પવન)
મો. 9998579515