વડગામના ભાંગરોડીયાના ૫૦થી વધુ યાત્રિકોએ શ્રવણ તીર્થ યાત્રા પૂર્ણ કરી

ગુજરાત સરકાર અને પવિત્ર યાત્રાધામ વિકાસ બોર્ડના સહયોગથી કચ્છ જિલ્લાના પવિત્ર યાત્રાધામોના દર્શનનો લાભ

તસવીર અહેવાલ : પુષ્કર ગોસ્વામી, વડગામ

વડગામ: પવિત્ર યાત્રાધામ વિકાસ બોર્ડ અને ગુજરાત સરકારના સહયોગથી અમલમાં મુકાયેલી શ્રવણ તીર્થ યાત્રા યોજના અંતર્ગત વડગામ તાલુકાના ભાંગરોડીયા ગામના ૫૦થી વધુ યાત્રિકોએ કચ્છ જિલ્લાના વિવિધ પવિત્ર યાત્રાધામોની યાત્રા પૂર્ણ કરી હતી.

તા. ૪ ઓક્ટોબરથી ૬ ઓક્ટોબર, ૨૦૨૬ દરમિયાન આશરે ૭૨ કલાકની આ યાત્રા દરમિયાન ભાંગરોડીયાના યાત્રિકોએ કચ્છ જિલ્લાના પવિત્ર યાત્રાધામોના દર્શન કરી ધન્યતા અનુભવી હતી. યાત્રા પૂર્ણ થયા બાદ યાત્રિકોએ સરકાર તથા પવિત્ર યાત્રાધામ વિકાસ બોર્ડનો આભાર વ્યક્ત કર્યો હતો.

આ અંગે **વડગામ તાલુકા આંજણા કેળવણી મંડળના મંત્રી અભેરાજભાઈ ચૌધરી (ભાંગરોડીયા)**એ જણાવ્યું હતું કે, સરકાર દ્વારા અમલમાં મુકાયેલી આ યોજના થકી ગામડાના સામાન્ય પરિવારના લોકો પણ રાજ્યના પવિત્ર યાત્રાધામોની મુલાકાત લઈ દર્શનનો લાભ મેળવી શકે છે. આવી યોજનાઓથી ગ્રામ્ય વિસ્તારના લોકો માટે ધાર્મિક અને સાંસ્કૃતિક સ્થળોની યાત્રા સરળ બની રહી છે.

યાત્રા દરમિયાન પાલનપુર વિભાગ દ્વારા બસની સુવિધા ઉપલબ્ધ કરાવવામાં આવી હતી. બસના ડ્રાઇવર અને કંડક્ટર દ્વારા પણ યાત્રિકોને જરૂરી સહયોગ અને માર્ગદર્શન પૂરું પાડવામાં આવ્યું હતું.

શ્રવણ તીર્થ યાત્રા સફળતાપૂર્વક પૂર્ણ થતાં ભાંગરોડીયા ગામના યાત્રિકોમાં આનંદની લાગણી જોવા મળી હતી.